Миннесота университетининг бир гуруҳ олимлари смайллар бир хил ва ҳар хил платформадаги смартфон фойдаланувчилари ўртасидаги мулоқотда тушунмовчиликни келтириб чиқаришини айтишди. Бу ҳақида GroupLense тадқиқот гуруҳининг расмий сайтида хабар берилди.

Олимлар тушунмовчиликка олиб келувчи смайлларни аниқлаш учун тадқиқот остидаги бир гуруҳ қатнашувчиларга пиктограммаларни -5 дан (қатъий салбий ҳис-туйғулар) 5 гача (қатъий ижобий ҳис-туйғулар) баҳолашни сўрашган.

Ҳар хил платформадаги фойдаланувчиларнинг мулоқотида энг кўп тушунмовчиликни келтириб чиқарувчи смайл – “кулиб кўзлари қисиқ бўлган юз” эмодзиси бўлиб чиқди.

Шуниси маълум бўлдики, Apple қурилмалари фойдаланувчилари хурсанд бўлиш смайлини юборишганда, Microsoft, LG ва бошқа компания қурилмаларини фойдаланувчилари уларни “чалкаштириш” ҳиссиётини юборишмоқда, деб ўйлашар экан.

Шу йўл орқали тадқиқотчилар бир неча бошқа машҳур смайлларни ҳам текшириб кўришди. Уларнинг кўпчилиги барча платформалар фойдаланувчилари томонидан тўғри қабул қилинар экан, аммо хали ҳам бир қанчасида тушунмовчилик мавжуд.

Масалан, “ухлаётган юз”, “қаттиқ йиғлаётган юз”, “кўзини юмиб ва оғзини очиб кулаётган юз” ва “кўз ёши билан кулаётган юз” каби смайллар тушунмовчилик ҳосил қилган.

Тадқиқотчилар эмодзилар мулоқотнинг машҳур воситаларидан бири бўлса-да, уларга жуда ҳам ишониш керак эмас, деган қарорга келишди.

Шунингдек, тадқиқот қатнашувчилари бир хил платформадаги пиктограммалар учун турли баҳоларни ҳам беришган.

Олимларнинг фикрига кўра, бу муаммонинг икки ечими мавжуд. Биринчидан, Unicode консорциуми янги пиктограммаларга аниқ таъриф беришлари лозим. Иккинчидан, дастурий таъминот ишлаб чиқарувчилар смайлларни ўхшаш ёки бир хил чизишлари шарт.