БМТнинг бош котиби Пан Ги Мун дунёнинг турли давлатларидан ўн минглаб одамлар ИШИД террорчилик гуруҳига қўшилганини айтди, деб хабар бермоқда РИА “Новости” ахборот агентлиги.

Пан ги Мун бу ҳақда БМТ Хавфсизлик кенгаши йиғилишида айтиб ўтди.

"ИШИДнинг Ироқ ва Суриядаги кампанияларига бутун дунёдан 30 мингдан кўпроқ одам қўшилган. Бу хорижий жангчилар ортларига қайтганидан кейин ўзининг ва бошқа давлатларнинг хавфсизлигига катта таҳдид солади", деб таъкидлаб ўтди Пан Ги Мун.

Бош котибнинг айтишича, ИШИД интернет ва ижтимоий тармоқларни қўллаш орқали ёшларни радикаллаштириш ва ёллашга қодирлигини намойиш қилди.

Бош котиб БМТга аъзо давлатлар ИШИДнинг нефть ва газ контрабандаси, маданий мерос буюмларини ноқонуний сотиш, пул олиш учун одамларни ўғирлаш ёрдамида, хориждан молиявий кўмаклар кўринишидаги маблағ йиғишини бартараф этувчи жиддий чоралар қабул қилишга мажбур эканликларини таъкидлаб ўтди.

Пан Ги Мун террорчиларни ёшларни ёллаш мақсадида интернетдан фойдаланиш имкониятидан маҳрум қилиш зарурлигини қўшимча қилди.