Россия президенти Владимир Путин, АҚШда ҳокимият алмашинуви тизими ишлашига шубҳа билдириб, Бушлар ва Клинтонлар оиласини фикрига далил сифатида кўрсатган. Бу ҳақда, давлат раҳбари 14 апрел куни ўтказган анъанавий "бевосита мулоқот"и чоғида баёнот берди, деб хабар қилмоқда РИА Новости.

«Штатларни олайлик. У ерда дастлаб (41 президенти) Жорж Буш давлат раҳбари бўлди, сўнгра ўғли Жорж Буш (43 президент). Барибир Бушлар оиласи вакили. АҚШнинг 42 президенти Билл Клинтон икки муддат Оқ уй раҳбари бўлди, энди эса, унинг рафиқаси даъвогарлик қилмоқда. Энди Клинтонлар оиласи ҳокимият тепасида қолиши мумкин. Қани бу ерда ҳокимият алмашинуви? Бизда айтишганидек, эрми-хотин барибир шайтон», — деган Владимир Путин.

Россия раҳбари, мамлакат сиёсий майдонига янги кучларнинг кириб келишига рухсат бериладими, деган саволга жавоб бера туриб, АҚШдаги вазиятни мисол келтирган.

Президентнинг қайд этишича, барқарор партияларнинг ҳокимиятни узоқ муддат ушлаб туриши дунёнинг кўплаб мамлакатларида кузатиладиган ҳолдир.

«Аммо, бу бизда кенгайиб бораётган партиялар мавжуд эмаслигини англатмайди. Сайловларда иштирок этиш учун айрим чекловларни олиб ташлашга қарор қилинди. Бир нарсани тўғри тушуниш керак, сайловчилар нимани ва қандай ҳоҳлаяпти?», — деб қўшимча қилган Путин.