Рианна ўзининг Fenty деб номланган шахсий бренди остида пардоз учун воситалар тўпламини ишлаб чиқаради. WWD хабар беришича, 28 ёшли америкалик хонанда LVMH компанияси билан 10 миллион долларлик шартнома тузган. Маълум бўлишича, тармоқ 2017 йилда ишга туширилиши кутилмоқда. Унинг таркибидаа айнан қандай косметикалар бўлиши ҳақида ҳозирча аниқ маълумотлар йўқ.

Рианнанинг косметика яратиш бўйича тажрибаси бор. Масалан, 2013 йилда M.A.C. учун лаб бўёғини тақдим этган. Қизил-бўғиқ тусдаги бўёқ RiRi Woo номини олган эди.

2014 йилдан бери Рианна Puma спорт брендининг креатив директори лавозимида ишлаб келмоқда. Март ойининг бошида у Тrainer Fenty Puma by Rihanna кроссовкалари моделини намойиш этди. Мазкур оёқ кийимини яратишда асосий эътибор матонинг сифати ва технологик таркибга каратилди: кроссовканинг тепа қисми оёқни маҳкам ёпиб турувчи материалдан тайёрланган. Мустаҳкамланган каркас пластиги эса товонлар яхши ҳаракатланишига ёрдам беради.

LVMH – француз трансмиллий компания бўлиб, унинг таркибига Louis Vuitton, Givenchy, Guerlain, Chaumet, Moët & Chandon ва бошқа брендлар киради.