Россия президенти Владимир Путиннинг собиқ рафиқаси Людмила Путинанинг исми кутилмаганда Marvel Comics студиясининг "Балойи азим" (Daredevil) сериалининг трейлерида намойиш қилинди. Людмила Путинанинг исми сериалнинг бош қаҳрамони ёнидаги деворда кириллча ёзувда ёзилган. Бу ёзув қаршисида сериалнинг иккинчи қаҳрамони – Жазоловчи турибди. У ёзувнинг баъзи жойларини тўсиб қўйган.

Девордаги ёзув "Людмила без Путина" деган иборадан тузилган деб тахмин қилинмоқда. Бу ёзувни Владимир Путин ва Людмила Путинанинг ажрашиши ҳақида маълумотлар пайдо бўлгандан кейин ҳақиқатан ҳам Россия шаҳарлари кўчаларида кўриш мумкин бўлган. Бу иборада Россия мухолифати ўртасида машҳур бўлган "Россия без Путина" шиорига кинояли тарзда ишора қилинган. Бироқ фильмдаги ёзувнинг бошқа тахминлари ҳам бўлиши мумкин, чунки трейлер саҳналарида унинг фақатгина "Людм", пастроқда "б", ва ўнгроқда "Путин" сўзларинигина кўриш мумкин.

Ҳозирча сериал яратувчилари нима учун Людмила Путинанинг исмидан фойдаланишга қарор қилганлари номаълумлигича қолмоқда. Бу Путиннинг исми АҚШ кинофильмларида тилга олинаётган ягона ҳолат эмас. Яқиндагина намойишлари бўлиб ўтган "Дэдпул" (Deadpool) фильмидаги кадрлардан бирида бар деворида бўр билан Путиннинг исми инглизча ҳарфлар билан ёзилганини кўриш мумкин бўлди. Бу деворда "Путин" сўзи АҚШлик машҳур одамлар – актёр Чарли Шин ва қўшиқчи Майли Сайрус исмлари билан ёнма-ён ёзилган.