Германияда 5 евро қийматидаги тангалар пайдо бўлди. Танганинг мавзуси – “Ернинг мовий табиати”, деб хабар беради Deutsche Welle.

ГФРнинг Молия вазирлиги хабарларига кўра, 14 апрелдан бошлаб тангаларни Бундесбанк (мамлакатнинг Марказий банки) филиаллари ва бошқа кредит муассасаларидан олиш мумкин.

Вазирликда қайд этилишича, 5 евро қийматидаги янги танга фақатгина Германияда эмас, балки бутун Европа Иттифоқи ҳудудида қонуний тўлов воситаси сифатида тан олинди.

Тангалар инновацион технологиялар ёрдамида зарб этилган.

“Танганинг ичида ёруғлик таратаётган мовийранг полимер узук бўлиб, у ички металл доирани ташқисидан ажратиб туради”, — деб ёзади Deutsche Welle.

Тахминларга кўра, келажакда бошқа тангалар ишлаб чиқаришда ҳам ушбу технологиядан фойдаланилади. Бу эса, ўз навбатида, қалбаки тангалар ишлаб чиқарувчиларга қарши курашишга ёрдам беради.

Германияда Марказий банк умумий ҳисобда 2,25 миллионга яқин шундай тангаларни зарб этишни режалаштирган. Улардан 250таси бўртиб чиқилган бўлиб, уларни ишлаб чиқаришда махсус “кўзгули ёғду” технологиясидан фойдаланилган ва барчаси коллекционерлар томонидан сотиб олинган.