Арманистон Тергов қўмитасининг муҳим ишларни кўриб чиқувчи бош бошқармасида мамлакатнинг собиқ президенти Роберт Кочарян қароргоҳига ҳужум уюштирилганлиги бўйича жиноий иш қўзғатилди. Бу ҳақида РИА Новости хабар берган.

Матбуот хизматининг маълум қилишича, жиноий иш доирасида Арманистоннинг иккинчи президентнинг қароргоҳига ўқув гранатасини отган кишини топиш бўйича зарур тергов ва қидирув ишлари олиб борилмоқда.

Дастлабки маълумотларга кўра, 15 апрель кечқурун жиноятчи Арманистоннинг собиқ президенти Роберт Кочарян қароргоҳининг бош дарвозасига автомобилда келган ва соқчилар томонга ўқув гранатасини ирғитган. Жиноят иши доирасида воқеа содир бўлган жой текшириб чиқилди, кўплаб гувоҳлар сўроқ қилинди, автомобилнинг русуми ва ранги аниқланди.

"Ҳозирги пайтда тергов ишлари давом этмоқда. Тергов натижалари ҳақида қўшимча маълумот берилади", - дейилди матбуот хизматида.