Украина президенти Пётр Порошенко 8 мартда Испанияда ҳордиқ чиқараётганда пайқалгани маълум бўлди. У бир ўзи, тансоқчиларисиз бўлган, деб хабар бермоқда "Украинская правда" нашри.

Таъкидланишича, Порошенкони испан шаҳарларидан биридаги дорихонада кўришган. Нашрга Порошенконинг суратларини берган гувоҳларнинг айтишича, у дорихонада витаминлар ва дори-дармон сотиб олган ва у билан русчада гаплашмоқчи бўлишганда, оқ рангдаги Porshe машинасига ўтиириб, кетиб қолган. Порошенко қўриқчиларсиз бўлган.

Нашрнинг таъкидлашича, Порошенконинг Испаниянинг Марбелья шаҳрида вилласи бор. У бу виллани президент бўлгунча сотиб олган. Бироқ маълум қилинишича, Порошенконинг 2015 йил учун топширган солиқ декларациясида хорижда кўчмас мулки борлиги кўрсатилмаган.

Порошенко маъмуриятида президент март ойи бошида Испанияга хусусий ташриф билан келганини, бироқ хавфсизлик нуқтаи назаридан бу ҳақда хабар берилмагани айтилди. Шунингдек, маъмуриятда таъкидланишича, Порошенкога жисмоний шахс сифатида тегишли бўлган барча мол-мулк декларацияда кўрсатилган ва даромад манбалари Украинада солиққа тортилган.