Сўнгги икки кун давомида Япониянинг жануби-ғарбий қисмини ларзага келтираётган зилзила қурбонларининг умумий сони 31 кишига етди. Бу ҳақида 16 апрель куни Кумамото префектурасига саосланиб ТАСС нашри хабар берди.

Берилган маълумотларга кўра, 2 мингдан ортиқ киши шифохонага етказилган, улардан 170 нафари оғир аҳволда.

Ўтган тунда Япониянинг жануби-ғарбий қисмида кетма-кет зилзилалар рўй берди, уларнинг магнитудаси 7,3 баллни ташкил қилди. Бу табиий офат кўплаб вайронагарчиликларга сабаб бўлди. Кюсю жануби-ғарбий ороли мана иккинчи кундирки, кучли ер силкинишларидан азоб чекмоқда. Япония метеорологик марказининг маълумотларига кўра, афтершок ҳолатлари яна бир неча кун давом этиши мумкин.

Кюсю оролида қутқарувчилар ишлашмоқда. Метеорологларнинг прогноз қилишларича, шанба куни кечқурун Япониянинг жануби-ғарбига сел келади, бу қутқарув операциясини янада қийинлаштиради.