Футбол бўйича Италия А сериясининг 33-турида 16 апрель куни 3та ўйин ўтказилди.

«Интер» — «Наполи»
Мамлакат чемпионлиги учун кураш олиб бораётган Неаполнинг «Наполи» клуби Миланга сафар қилиб, «Интер»га мағлуб бўлди.

Мезбонларнинг биринчи бўлимда урган икки голига «Наполи» футболчилари жавоб бера олишмади. Эндиликда жамоа ҳисобидаги очколар 70талигича қолиб, неаполликлар турнир жадвали пешқадами «Ювентус»дан 6 очкога ортда қолмоқда. 17 апрель куни «Палермо»га қарши ўз ўйинини ўтказадиган «Ювентус» 3 очкони қўлга киритса, пешқадамлар орасидаги фарқ 9 тага етади.

«Интер» эса 61 очко билан 4-ўринни эгаллаб турибди. Ҳали тур ўйинларини ўтказмаган «Рома» ва «Фиорентина» жамоалари 64 ва 56 очко жамғарган ҳолда мос равишда 3 ва 5-ўринларни банд этган.

«Интер» — «Наполи» 2:0
Голлар: Мауро Икарди, 4 (1:0). Марсело Брозович, 44 (2:0).
Огоҳлантиришлар: Нагатомо (14), Жоржиньо (22), Мурильо (33), Перишич (42), Альбиоль (55), Кондогбиа (61), Мертенс (73).

«Карпи» — «Женоа»
Лига дебютанти «Карпи» эса хавфли зонадан чиқиб олди. «Женоа»га қарши ўйиндаги йирик ғалабада Армандо Иццонинг майдондан четлатилиши муҳим рол ўйнади. Унга қадар ҳисобда олдинда бораётган меҳмонлар, бир киши қолгандан кейин 4та гол ўтказиб юборишди. «Карпи» очколари сонини 31 та етказиб, 28 очкоси бор «Палермо»ни хавфли зонага тушириб юборди. «Женоа» эса 40 очко билан 11-ўринда қайд этилган.

«Карпи» — «Женоа» 4:1
Голлар: Леонардо Паволетти, 34 (0:1). Антонио Ди Гаудио, 45+4 (1:1). Лоренцо Лолло, 45+5 (2:1). Лоренцо Пашиути, 49 (3:1). Стефано Сабелли, 86 (4:1).
Огоҳлантиришлар: Гальоло (22), Иццо (25), Лолло (42), Поли (53), Мбакогу (67).
Четлатиш: Армандо Иццо, 45+1 (Ж).

«Болонья» — «Торино»
Ҳали лигада қолиш масаласини ҳал этмаган «Болонья» ўз уйида «Торино»га мағлуб бўлди - 0:1. Болоньяликлар 37 очко билан 13-ўринда. «Торино» эса бу ғалабадан кейин кейинги мавсумда ҳам А серияда иштирок этиш масаласини ҳал қилди - 42 очко ва 10-ўрин.

«Болонья» — «Торино» 0:1
Гол: Андреа Белотти, 90+2-пен (0:1).
Огоҳлантиришлар: Россеттини (13), Бриенца (28), Бово (41), Масина (82), Миранте (90).

Бугун «Рома» «Аталанта» майдонига боради, «Ювентус» «Палермо»ни қабул қилади, «Милан» эса сафарда «Сампдория»га қарши ўйнайди. Шунингдек, бугун «Удинезе» — «Кьево», «Фиорентина» — «Сассуоло», «Верона» — «Фрозиноне» ҳамда «Лацио» — «Эмполи» учрашувлари ўтказилади.