17 апрелга ўтар кечаси Эквадорнинг Тинч океани билан туташган қирғоқлари яқинида 7,8 балли зилзила юз бериши натижасида қурбон бўлганлар сони 41 нафарни ташкил қилмоқда. Бу ҳақда мамлакат вице-президенти Хорхе Гласага асосланиб, Рейтер агентлиги хабар тарқатган.

Вице-президентнинг қайд этишига кўра, қурбонлар сони ортиши мумкин.

Гласанинг таъкидлашича, бу зилзила 1979 йилдан буён энг кучлиси бўлди. Бу ер силкиниши туфайли мамлакат ғарбидаги ҳудудлар, айниқса Гуаякиль шаҳри катта талофат кўрган. Ҳукумат аҳолини хавфли ҳудудлардан кетишга чақирмоқда.

Агентлик маълумотларига кўра, мамлакат президенти Рафаэль Корреа бу фожиа туфайли Италиядаги ташрифини тўхтатиб, ватанига қайтган.

Зилзила 17 апрелга ўтар кечаси маҳаллий вақт билан соат 23:58да (Тошкент вақти билан 17 апрель, соат 04:58да) содир бўлди. Зилзила маркази Муинсе шаҳарчасидан 28 км жануби-шарқда бўлган, унинг чуқурлиги 20,2 км.

Мамлакат бўйлаб фавқулодда ҳолат жорий этилган.