Германия ғарбидаги Эссен шаҳрида ҳиндлар яшайдиган жамоатда 16 апрелда портлаш юз берди. Spiegel нашрининг маълум қилишича, портлаш оқибатида бир неча киши жароҳат олган, улардан 2 нафарининг аҳволи оғир дея баҳоланмоқда.

Нохуш воқеа никоҳ тўйи ўтаётган ибодатхонада юз берган. Соат 19:00 ларга яқин ибодатхонага тўй ўтаётган пайт ниқобдаги бир киши кириб, портловчи моддани улоқтириб, қочиб кетган. Портлаш оқибатида ибодатхона биносига жиддий шикаст етган.

Таъкидланишича, портлаш вақтида тўйнинг асосий қисми якунига етиб, тўйда иштирок этаётган кўпчилик қўшни залга ўтишган бўлган. "Агар жиноятчи бомбани бироз олдинроқ отганда, жабрланганлар сони анчагина кўпроқ бўларди", деб воқеа гувоҳларидан бирининг сўзларини келтириб ўтди Bild нашри. Гувоҳнинг айтишича, тўйга 200 га яқин киши, жумладан болалар ҳам келган.

Жароҳатланганларнинг аниқ сони маълум қилинмаган. Гувоҳларнинг айтишича, ибодатхона яқинида қора йўлтанламас автомобиль пайқалган.

Бироздан кейин полиция гувоҳларнинг кўрсатмаларига мос келувчи қора автомобилни аниқлаган. Унинг ичида 3 киши бўлган, уларнинг барчаси ҳибсга олинган.