Италиянинг ITINERA компанияси Эронда 4 млрд долларга иккита тезюрар темир йўл қуради. Бу ҳақда Fars агентлиги хабар берди.

"Италия Эронда темир йўл қуришга 4 млрд инвестиция қилишга рози бўлди. Қурилиш ҳақидаги келишув Теҳронда Италиянинг ITINERA компанияси ва Эроннинг бу соҳадаги иккита етакчи компанияси ўртасида имзоланди", дейилмоқда хабарда.

ITINERA расмий вакили Пино Арлачининг айтишича, айни вақтда инвестицион, суғурта ва банк масалалари устида ишланмоқда. Ўзаро ҳисоб-китоблар еврода амалга оширилади.

Эрон темир йўллари ташкилотининг халқаро алоқалар бошқармаси раҳбари Аббос Назарийнинг айтишича, гап Кум-Арақ ва Теҳрон-Хамадан тезюрар темир йўллари қурилиши ҳақида кетмоқда. Назарийнинг қўшимча қилишича, кредитнинг суғурталанишини Италия давлат экспорт-кредит агентлиги SACE таъминлайди. Бу акционерлик жамияти Теҳрон ва Рим ўртасидаги битимларни чекланмаган миқдорда суғурталашни таъминлашга тайёрлигини билдирди, деб таъкидлаб ўтди Fars агентлиги.