16 апрель куни Лондон шаҳри марказида минглаб британияликлар ҳукумат сиёсатига қарши намойишга чиқишди. BBC нашри хабарига кўра, намойишчилар ҳукуматнинг харажатларни тежаш борасидаги чораларига қарши чиқишган.

Намойишчилар шаҳар марказидаги Трафальгар майдонига йиғилишган. Улар соғлиқни сақлаш, таълим ва ижтимоий таъминот соҳаларини молиявий таъминоти қисқартирилишига қарши чиқишган.

Ҳукумат тежаш чоралари, бюджет етишмовчилигини камайтириш ва таълим ва соғлиқни сақлаш ҳамда миллий хавфсизликни талаб даражасида ушлаб туриш учун эканлигини таъкидлаган.

Ҳукумат ижтимоий харажатларни 2020 йил – парламент фаолият муддати якунлангунга қадар 12 млрд фунтга (қарийб 17 млрд доллар) қисқартиришни режалаштирган эди. Аммо ижтимоий таъминотни қисқартириш режаси меҳнат ва пенсия вазири Иэн Дункан Смит истеъфосидан сўнг бекор қилинган.

Улар мамлакат бош вазири Дэвид Кэмероннинг истеъфосини талаб қилишган.

Намойиш Кэмероннинг қариндошлари "Панама можаролари"га алоқадорлиги маълум бўлишидан аввалроқ режалаштирилгани айтилган.

Лекин, намойиш ташкилотчиларидан бўлган "Миллий Ассамблея" ҳаракати вакилининг фикрича, "Панама можаролари" туфайли ҳукуматга ишонч йўқолган.