Facebook бош директори Марк Цукерберг Ҳиндистоннинг Коччи шаҳридаги Муҳандислик коллежи талабаси Амаль Августиндан қизи учун махсус домен номини сотиб олди. Уддабурон талаба домен нархини 700 долларга баҳолади.

Ижтимоий тармоқлар орасида энг улкани ҳисобланган Facebook вакиллари Августинга домен номини сўраб, мурожаат қилишганида у maxchanzuckerberg.org регистрацион ҳуқуқи учун савдолашди. Бу ҳақида The Times of India нашри хабар берган.

Макс бу Марк Цукерберг қизи Максим Чан Цукерберг (Maxime Chan Zuckerberg) исмининг қисқартирилган тахаллусидир.

Августин Керала штатидаги Муҳандислик коллежининг электроника бўйича битирувчи талабаси бўлиб, унинг интернетда домен номларини сотишга бўлган иштиёқи бир мунча даромад тўплашига ёрдам берди.

“Мен бир неча йиллар давомида кўплаб домен номларини киритишга муваффақ бўлдим. Ушбу домен номини эса ўтган йилнинг декабрь ойида Цукерберг фарзанди дунёга келганида рўйхатдан ўтказган эдим”, - дейди Муҳандислик коллежи талабаси Амаль.