Нефть нархининг юқорилаши 20 ой давом этган нефть бозоридаги нархларнинг қулаши эҳтимол ўз якунига етаётгани ҳақида тахмин қилишга асос бўлади. Бу ҳақда ОПЕК бош котиби Абдулла ал-Бадрийнинг Халқаро валюта жамғармасига берган баёнотида айтилди.

Ал-Бадрийнинг айтишича, бу ҳолат нефтнинг меъёридан ортиқ ишлаб чиқарилишини қисқартиришга қаратилган умумжаҳон саъй-ҳаракатлари ортида юз берди. Ал-Бадрий нефть нархларига ижобий таъсир қилувчи омил қаторида АҚШдаги бурғилаш қурилмаларининг қисқаришини айтиб ўтди, бу эса АҚШда нефть қазиб олишнинг камайишига олиб келди.

ОПЕКнинг баҳолашича, 2016 йилда нефтга жаҳон талаби кунига 1,25 млн баррелга ошади. ОПЕКнинг фикрича, ОПЕК нефтига талаб кунига 1,8 млн баррелга ошади, ОПЕКка кирмайдиган давлатлардан нефть етказиш миқдори кунига 700 минг баррелга қисқаради.

17 апрелда Қатар пойтахти Доҳада Эрон ва Ливиядан ташқари, ОПЕКнинг барча иштирокчилари ҳамда Россия, Мексика, Колумбия, Уммон, Қозоғистон ва Озарбайжон вакиллари учрашуви бўлиб ўтмоқда. Бу учрашувдаги асосий мавзу нефть қазиб олиш ҳажмини музлатиш бўлмоқда. Таҳлилчиларнинг фикрича, музокараларнинг натижаларидан қатъий назар, улар нефть етказиш ҳажмига ҳеч қандай таъсир кўрсатмайди.

Bank of America Merill Lynch ва Saxo Bank экспертларининг фикрича, агар музокаралар муваффақиятсиз якунланса, нефть нархи ҳозирдаги 43 доллардан 30-35 долларгача тушиб кетиши мумкин.