Япониянинг жануби-ғарбида жойлашган Кюсю оролида охирги 3 кун ичида 388 та зилзила юз берди. Бу ҳақда 17 апрелда Япония миллий метеорологик бошқармаси маълум қилди.

Улар орасида энг кучлиси 7,3 ва 7,1 магнитудали зилзилалар бўлди.

Охирги маълумотларга кўра, бу кунлар ичида табиий офат оқибатида 41 киши ҳалок бўлди, 2 мингдан кўпроқ киши турли оғирликдаги жароҳатлар билан шифохоналарда қолмоқда.

Ўтган кеча Кумамото префектурасида кучли шамоллар билан кечган кучли ёмғир ёғиб  ўтди. Бу эса ҳудуддаги қутқарув ишларини анча мураккаблаштирди. Миллий мудофаа кучлари аскарлари, полиция ва ўт ўчириш бошқармаси ходимлари бедарак йўқолганларни топиш умидида вайроналарни тозалашмоқда. Қутқарув операциясида умумий ҳисобда 30 минг одам иштирок этмоқда.

Маҳаллий сейсмологлар ер ости силкинишлари яна камида бир ҳафта давом этиши ва янги кучли зилзила юз бериши мумкинлигидан огоҳлантиришмоқда.

Кумамото префектурасида шаҳар транспорти қатнови деярли тўхтатилган. Барча автомобиль магистраллари ёпилган.

Кумамото ва Оита префектураларининг 240 мингдан кўпроқ аҳолиси махсус марказлар, мактаблар ва муниципал биноларда жойлаштирилганлар. Кумамотода деярли 80 мингта турар жой биноси электр таъминотисиз қолмоқда.