Гимнастика бўйича Ўзбекистон терма жамоаси аъзоси, уч карра жаҳон чемпиони Оксана Чусовитина Рио-де-Жанейрода 2016 йил бўлиб ўтадиган Олимпиада ўйинлари тест синовларидан муваффақиятли ўтди ва Олимпиадага йўлланмани қўлга киритди. Бу ҳолатда спортчи Олимпиада ўйинларида етти марта иштирок этадиган тарихдаги биринчи гимнастикачи бўлади.

Олимпиада олди тест мусобақаларида 40 ёшли Чусовитина якунда 45-ўринни қайд этган. У қўлга киритган натижа унинг Рио-2016 ўйинларига боришини таъминлади.

Оксана Чусовитина олтита Олимпиадада иштирок этган тарихдаги ягона гимнастикачи ҳисобланади. Спортчи 1991 йилда Собиқ Иттифоқ таркибида АҚШнинг Индианаполис шаҳрида ўтган жаҳон чемпионатида 2 та олтин медаль ва битта кумуш медаль ютган ҳолда ўзининг дебютини бошлаган.

Барселонадаги 1992 йилги Олимпиадада Чусовитина МДҲнинг бирлашган жамоаси таркибида жамоавий мусобақаларда Олимпия чемпиони бўлган. Спортчи, шунингдек, 2008 йилги Пекин Олимпиадасининг кумуш медали соҳибаси, жаҳон чемпионатларининг 3 карра чемпиони, 4 карра кумуш ва 4 карра бронза медаллари соҳибаси ҳисобланади.
Чусовитина, шунингдек, Германия терма жамоаси сафида ҳам иштирок этган.