Британиялик фермер Люк Ирвин ўзининг омбори ёнида Рим империяси замонларига тегишли нодир асори-атиқаларни топиб олди, деб хабар бермоқда Daily Mail нашри. Шундан кейин фермер археологлар билан боғланди, улар эса ўз навбатида бу жойда қазилма ишларини олиб бориб, бой Қадимги Рим вилласининг яхши сақланиб қолган қолдиқларини аниқлашди.

Олимлар вилла милоднинг 175 ва 220 йиллари оралиғидаги вақтда қурилганини, кейинроқ эса бир неча бор реставрация қилинганини аниқлашди. Бундан ташқари, олимлар фермер омбори ёнида сопол идишлар, тангалар, тўғнағичлар, ёввойи ва уй ҳайвонларининг суяклари ҳамда бир боланинг тобутини аниқлашган.

Археологларнинг айтишича, аниқланган вилла Буюк Британия ҳудудида аниқланган Қадимги Рим виллаларидан энг бадавлати бўлиши мумкин.

Қадимги Рим виллалари ўзидан ҳордиқ учун дала-ҳовлиларни намоён қилган. Вилланинг ўзига хос жиҳати шундан иборат бўлганки, у доимий турар жой бўлмаган. Виллада унинг эгалари йил давомида оз вақт яшашган.