Associated Press нашрининг хабар беришича, Эквадорда кучли зилзила қурбонларининг сони 350 нафарга етди. Бу ҳақида ҳукумат вакиллари маълум қилишди.

Аввал 262 нафар киши ҳаётдан кўз юмганлиги ҳақидаги хабар берилганди.

17 апрелга ўтар кечаси Эквадорда 7,8 магнитудали зилзила юз берди. АҚШ Геологик хизмати маълумотларига кўра, зилзила маркази соҳилбўйидаги Муисне шаҳридан 27 км узоқликда соҳилбўйида жойлашган бўлган. Мамлакатнинг 6 та вилоятида фавқулодда вазият тартиби киритилди.

Зилзила марказидан 300 км узоқликда бўлган Гуаякиле шаҳридаги кўприк қулаган. Пойтахт Китода электр таъминот ва телефон алоқаси издан чиққан.

Жабрланган ҳудудларга 10 минг ҳарбий ва 3,5 минг полициячи жўнатилган.

Зилзиладан кейин Манаби вилоятида юзлаб маҳбуслар қамоқхонадан қочиб кетган.