Россиялик гитарачи Елена Фоменко 17 апрелда Куба пойтахтида очилиши бўлиб ўтган 14-Халқаро гитара танловида иштирок этмоқда. Ҳаванада Россия, Коста-Рика, Мексика, Испания, Руминия ва Кубадан 19 нафар иштирокчи тўпланди, улар нуфузли мусиқий танловда бош соврин учун кураш олиб боради. Россиялик гитарачининг сўзларига кўра, бу соврин катта концертга йўлланма олиш имкониятидир.

Мусиқа байрами машҳур кубалик гитарачилар Марко Тамайо ва Ҳоакин Клерчнинг чиқиши билан бошланди. Таниқли меҳмонлар орасида испаниялик Анабель Монтесинос, Давид Мартинес, Ҳауме Торрент, Эдуардо Инесталь, бразилиялик гитарачи Фабио Занон, америкалик пианиночи Антони Спайри кабилар бор.

Кубадан эса Клерч ва Тамайодан ташқари яна гитарачи Эдуардо Мартин, Амадео Рольдан номидаги чолғу квартети, машҳур Куба сопраноси Барбара Льянес қатнашмоқда.

Танловнинг мажбурий дастурида Куба ва Лотин Америкаси муаллифларининг пьесалари, финалчилар учун эса Ҳоакин Родригонинг "Аранхуэс концерти" ижроси кўзда тутилган.

Мусиқачиларнинг икки йилда бир ўтказиладиган бу галги учрашуви кубалик гитарачи Исаак Николанинг 100 ёшлиги (1901-1999) ҳамда фестиваль раиси маэстро Жесус Ортеганинг 80 йиллигига бағишланади. 24 апрель куни якунланадиган фестивалнинг танлов қисмида учта мукофотни топшириш кўзда тутилган: биринчи ўрин - 5 минг доллар, иккинчи ўрин- 3 минг доллар ва учинчи ўрин - 2 минг доллар.

Бундан ташқари, энг яхши кубалик ижрочи мукофот сифатида концерт гитарасини ва хорижда ўқиш ҳуқуқини қўлга киритади.