«Атлетико» жамоаси бош мураббийи Диего Симеоне Испания чемпионатининг 33-турида «Гранада»га қарши кечган ва 3:0 ҳисобида якунланган ўйиндан кейинги фикрларини билдириб ўтди.

«Биз бугунги ғалабадан жуда хурсандмиз. Энди ЕЧЛ йўлланмаси нақ қилинди. Кўпчилик ҳали бунга эътибор қаратмаётгандир, лекин биз учун бу катта ютуқ.

Олдинда бизни «Атлетик»ка қарши жиддий баҳс кутиб турибди. Ундан ташқари, Испания чемпионатида яна 4та ўйин ўтказамиз. Қолган барча ўйинларда ғалаба қозониш қийин, аммо биз шу ишни амалга ошириш учун ҳаракат қиламиз. Эндиликда «Атлетико»дан фақат бир нарса талаб этилади — ғалаба қозониш, ғалаба қозониш ва ғалаба қозониш», — дея Симеонедан иқтибос келтиради Football Espana.

33 тур ўйинларидан кейин, «Атлетико» «Барселона» билан бир хил очко тўплаган - 76та. Каталонияликлар тўплар нисбатига кўра биринчи ўринга жойлашишган. «Реал» 75 очко тўплаб, учинчи ўринда кетмоқда.