McDonald’s 2017 йилдан бошлаб ўз ресторанларида таомларга буюртмаларни мобил дастур орқали қабул қилишни режалаштирмоқда ва мазкур ғоя етказиб бериш хизматини ривожлантириш учун янги бир самарали йўл ҳисоблашмоқда. Бу ҳақида ТАСС ахборот агентлигига McDonald’sнинг Россиядаги бошқарувчи директори Алексей Семенов сўзлаб берди.

Унинг сўзларига кўра, компания мижозлар учун телефон ёки смартфон орқали буюртма бериб, уни тезда ресторанда қабул қилиб олишга имкон берадиган дастурни тайёрламоқда.

“Ҳозирда дастур жаҳон миқёсида тайёрланмоқда. Маҳаллий миқёсда синовлар ҳали бошлангани йўқ. Менинг фикримча, синовдан ўтказиш ва ишга тушириш (албатта бу синовнинг яхши ўтганидан сўнг) кейинги йилда амалга оширилади”, - деб айтди Семенов.

“Мобил буюртма” дастури фойдаланувчига буюртмани шакллантиришга ва унинг учун тўловни (телефон ҳисоб рақамга ёки банк картасига уланган бўлади) амалга оширишга ёрдам беради. Мижознинг ресторанга ташриф буюрганда фақатгина буюртмасини олиш керак бўлади. Лойиҳанинг техник қисмлари эса ишлаб чиқилмоқда.

ТАСС ахборот агентлигининг маълумотига кўра, Франциядаги McDonald’s ресторанларида мобил дастурлар ҳозирги кунда мавжуд.

Семеновнинг таъкидлашича, мобил дастурнинг энг муҳим қисми McDonald’s маҳсулотларининг мижозларга етказиб берилиши ҳисобланади. Унинг сўзларига кўра, таомларни етказиб бериш ҳақидаги ғоя “ҳавода учиб юрибди”, аммо компаниянинг бу савол бўйича тайёр ечими мавжуд эмас.