АҚШ долларининг 20 апрель куни учун белгиланган расмий курси 65,65 рублни (-2,62 рубль) ташкил этмоқда. 1 евро эса, 74,37 рублга (- 2,76 рубль) тенг қилиб белгиланган. Бу ҳақда Россия марказий банки сайтида хабар қилинган.

Москва биржасида эса, бир доллар 65,57 рубль, Европанинг ягона валютаси 74,33 рублдан сотилмоқда. Россия пул бирлиги нефть нархининг ўсаётганига боғлиқ равишда мустаҳкамланиб боряпти.

Brent маркали нефтнинг бир баррели Лондоннинг ICE Futures биржасида 43,47 доллардан сотилмоқда.

Кувайт нефть саноати ишчилари иш ташлашни бошлагани тўғрисидаги хабарлардан сўнг, нефть нархи кўтарила бошлади, деб хабар қилмоқда «Интерфакс». Ушбу иш ташлаш, нефть бозорига ижобий таъсир кўрсатди. Нефть қазиб олувчи мамлакатлар энергетика вазирларининг Доҳадаги учрашуви самарасиз якунлангач, нефть баҳоси тушиб кета бошлаган эди.

Кувайтдаги иш ташлашда нефть саноти вакилларининг 40 фоизи қатнашмоқда. Шу муносабат билан нефть қазиб олиш кўрсаткичи 60 фоизга қисқариб, кунига 1,7 миллион баррелни ташкил этмоқда.

12 апрель куни Россия молия вазири Антон Силуанов, нефть нархи кўтарилгудек бўлса, рубль курсини паст ушлашга ваъда берган эди. Унинг сўзларига кўра, мамлакат ҳукумати янги бюджет қоидаси ишлаб чиққан. Эндиликда, нефть нархи кўтарилса, барча қўшимча даромадлар захира жамғармаларига олинади.