19 апрель куни Москва биржасидаги савдоларда Россия рубли бирмунча кўтарилди. Москва вақти билан соат 10:10да, 1 АҚШ доллари учун 65,7 рубль нарх белгиланган. 1 евро 74,4 рублга тенг бўлди.

Рубль курси мустаҳкамланишига Brent русумли нефть нархи ўсиши сабаб бўлди.

Brent маркали нефтнинг бир баррели, Лондоннинг ICE Futures биржаси июнь ойи фьючерс савдоларида 1,9 фоизга кўтарилиб, 43,77 долларни ташкил этган.

Кувайт нефть саноати ишчилари иш ташлашни бошлагани тўғрисидаги хабарлардан сўнг, нефть нархи кўтарила бошлади. Ушбу иш ташлаш, нефть бозорига ижобий таъсир кўрсатди. Нефть қазиб олувчи мамлакатлар энергетика вазирларининг Доҳадаги учрашуви самарасиз якунлангач, нефть баҳоси тушиб кета бошлаганди.

Кувайтдаги иш ташлашларда ички нефть санотининг 40 фоизи қатнашди. Шу муносабат билан, нефть қазиб олиш кўрсаткичи 60 фоизга қисқариб, кунига 1,7 миллион баррелни ташкил этди.

Март ойи ҳолатига кўра, жаҳон бозорида нефтга бўлган талаб таклифга нисбатан 1,6 миллион баррелга ўсишни қайд этган.