Саудия Арабистони нефть вазири Али ал-Наимий Доҳадаги муваффақиятсиз музокаралардан кейин истеъфога кетиши мумкин, деб хабар бермоқда Petromatrix таҳлилчиларининг маърузасига иқтибос келтирган ҳолда Bloomberg агентлиги.

Маърузада муваффақиятсиз музокаралар ал-Наимийнинг мавқеини заифлаштиргани айтилган. Бу, битим барбод бўлгандан кейин ал-Наимий ОПЕК бўйича ҳамкорларининг ишончини йўқотгани билан боғланмоқда.

Таъкидланишича, ал-Наимий ҳамкорларга Саудия Арабистони келишувни қўллаб-қувватлашига ваъда берган, бироқ валиаҳд шаҳзода Муҳаммад ибн Салмон босими остида ўз фикрини ўзгартиришга мажбур бўлган.

Аввалроқ нефть қазиб олувчилар нефть қазиб олиш ҳажмини музлатиш бўйича келиша олмаганлари маълум бўлганди. Қатардаги учрашув ҳеч қандай натижа бермаган.