Apple компанияси Tesla Motors компаниясининг автомобиллар яратиш бўйича собиқ вице-президенти Крис Порриттни ишга ёллади, деб хабар берди Electrek нашри.

Apple’да Крис Порритт автомобиль лойиҳасини бошқариши ва аввалроқ компанияни тарк этган Стив Задески ўрнига келиши мумкин. Apple’нинг электромобиль яратиш бўйича лойиҳаси Project Titan деб номланади, бироқ компания автомобиль ишлаб чиқариш борасида ҳеч нарса айтмаяпти.

Бунгача Порритт Land Rover’да ишлаган ва Aston Martin’нинг бош муҳандиси бўлган. У One-77, V12 Zagato ва DB9 каби автомобилларнинг яратилиши учун жавоб берган. Порритт Tesla’да Model S, X ва 3 моделларини яратиш устида ишлаган.

Таҳлилчиларнинг фикрича, Apple’нинг 2019 йилгача электромобиль яратишга имкони 50-60 фоизни ташкил қилади. Электромобиль эга бўладиган асосий хусусиятлар ўзига хос дизайн, мобиль қурилмалар билан фаол ишлаш имконияти ва автопилот функциясини киритиш ҳисобланади

Аввалроқ Tesla компанияси раҳбари Илон Маск Apple’ни "Tesla муҳандислари қабристони" деб атаганди.