Россия президенти Владимир Путин Ўзбекистон раҳбари Ислом Каримовни Москвада кутади. Бу ҳақда у хориж давлатлари элчиларидан ишонч ёрлиқларини қабул қилиб олиш маросимида маълум қилган.

Бугунги маросимда Ўзбекистоннинг Россиядаги элчиси Баҳром Ашрафхонов Россия президенти Владимир Путинга ишонч ёрлиғини топширган.

Ёрлиқни қабул қилар экан, Владимир Путин Россияда Ўзбекистон билан «яқин иттифоқчилик руҳида кечаётган» муносабатлар юқори баҳоланишини таъкидлаб ўтди

У Ўзбекистон Президенти Ислом Каримовнинг 25-26 апрель кунлари Россия Федерациясига қиладиган расмий ташрифи икки томонлама муносабатларни янада чуқурлаштиришига ишонч билдирди.

Путин Россия Тошкентнинг Шанхай ҳамкорлик ташкилоти раиси сифатида ўтган йили Уфада ўтказилган ШҲТ саммитида қабул қилинган қарорлар, жумладан, ташкилот таркибини кенгайтириш бўйича олиб бораётган ишларини қўллаб-қувватлашини ҳам қайд этиб ўтди.

Бундан аввалроқ, Ислом Каримов 25 апрель куни ҳарбий жўнатмалар масаласини муҳокама қилиш учун Москвага бориши ҳақида хабар қилинганди.