Япония бош вазири Синдзо Абэ майдаги "катта еттилик" саммити олдидан Европага сафари дастурини Кюсю оролидаги зилзилалар сабабли қисқартирмоқчи. Бу ҳақда Nikkei нашри хабар бермоқда.

Дастлаб Абэнинг Японияда бир қатор дам олиш кунлари бўладиган апрель охири-май бошида Буюк Британия, Германия, Италия, Швейцария ва Бельгияга ташриф буюриши режалаштирилганди. Япон ОАВ таъкидлагандек, бундан кейин Абэнинг Россияга норасмий сафари белгиланганди. Абэ Россияга 6 майда келиши мумкинлиги айтилган.

"Бироқ вайронакор зилзилалардан кейинги афтершоклар давом этаётгани сабабли бош вазирнинг Японияда бўлмаслиги вақтини иложи борича қисқартириш керак, деган фикр бор", деб ёзди газета. Энди Абэнинг Европа давлатларига сафари май бошида ўтиши кутилмоқда.

12 апрелда Россия ташқи ишлар вазири Сергей Лавров Мўғулистон, Япония ва Хитой ОАВга берган интервьюсида Абэ яқин орада Россияга келишини айтганди.

Кюсюдаги 6,5 магнитудали 1-зилзила 14 апрелда юз берган ва катта талофатлар келтириб чиқарган. Бу зилзиладан кейин 100 дан ортиқ кучсизроқ зилзилалар бўлиб турган ва 15 апрель кечки пайт магнитудаси 7,3 гача етган бир қатор кучли зилзилалар юз берган.