Жанубий Дания Университети амалиёт ва соғлик бўйича Миллий илмий-тадқиқот маркази ва Сидней университети тадқиқотчилари ўтириб ишлаш соатларини камайтириш саломатликка ижобий таъсир этишини исботлаб беришди. Тадқиқот International Journal of Epidemiology журналида чоп этилди.

Олимлар ўтириб ишлаш вақтини камайтириш имконини берувчи методика ишлаб чиқишди. Натижалар шуни кўрсатдики, агар инсон (саккиз соатлик иш куни бўйича) бир ой давомида 71 дақиқа камроқ ўтирса, бу унга танада ёғлар эриши эвазига вазнни 0,61 фоизга камайтиришга ёрдам беради.

Тадқиқотда даниялик ва гренландиялик 317 нафар офис ишчиси иштирок этди. Уларни тасодифий тартибда назорат ёки тажриба гуруҳларига бўлинди. Тажриба орқали иштирокчиларнинг ҳафтада беш кунлик иш давомида қанча вақт ўтириб ишлагани ўлчанди.

Бир ойдан сўнг тажриба гуруҳидагилар назорат гуруҳидагиларга нисбатан 71 дақиқа кам ўтириб ишлашган. Уч ойдан сўнг бу фарқ 48 дақиқага қисқарган. Қадамлар сони эса биринчи ойда етти фоизга, уч ой давомида эса саккиз фоизга кўп бўлган. Олти фоиздан камроқ қатнашчи тик оёқда ўтказиладиган вақт миқдорининг ортиши билан боғлиқ ноқулайликлардан арз қилган.

Олимларнинг таъкидлашича, офис ишчилари “мубтало” бўлган узоқ ўтиришни тақозо этувчи ҳаёт тарзи семизлик, юрак-қонтомир тизими муаммолари ва бошқа хасталикларнинг асосий сабаби бўлиб хизмат қилади.