2016 йил 28 апрель куни Жанубий Корея республикаси пойтахти Сеул шаҳрида "Invest in Uzbekistan" (Ўзбекистонга сармоя киритинг) бизнес-форуми бўлиб ўтади. У, Ўзбекистон Давлат рақобат қўмитаси ва Корея биржаси ҳамкорлигида ташкил этилади.

Ўзбекистон ҳукуматининг 2016 йил 19 апрелдаги қарорига кўра, бош вазир биринчи ўринбосари раҳбарлигидаги расмий делегация таркиби тасдиқланди. Унда маҳаллий кимё ва электротехника саноати акционерлик жамиятлари, қурилиш материаллари ишлаб чиқариш, ёқилғи-энергетика мажмуаси, машинасозлик ва темир йўлда юк ташиш ҳамда истеъмол маҳсулотлари ишлаб чиқариш, молиявий ва бошқа хизматлар кўрсатиш соҳаси вакиллари қатнашади.

Бизнес-форумда Ўзбекистон иқтисодиётининг барча соҳаларида яратилган инвестицион имкониятлар намойиш этилади. Корейс компаниялари шунингдек, камида 15 фоиз хорижий капитални жалб этиш режалаштирилаётган 50дан ортиқ акционерлик жамияти молиявий-хўжалик юритиш фаолияти билан яқиндан танишиш имкониятига эга бўлади.

2011 йилдан Ўзбекистонда Корея биржаси билан ҳамкорликда, 6 миллион долларлик қимматли қоғозлар бозорини модернизация қилиш лойиҳаси амалга оширилмоқда. Жорий йил охиригача, Ягона дастур-техник мажмуаси ишга туширилади, унда савдо, депозитар ва назорат тизимлари фаолияти умумлаштирилади.