«Боко Ҳарам» террорчи гуруҳининг отларга минган жангарилари Нигерия шимоли-шарқидаги қишлоқлардан бирига ҳужум уюштирди ва унга ўт қўйди. Франс Пресс агентлиги хабарига кўра, бу ҳужум натижасида 11 киши ўлдирилди.

Бу ҳодиса Даматуру шаҳридан 150 километр масофада жойлашган Занго қишлоғида содир бўлган.

"Жангарилар ярим тунда ҳужумга ўтди ва қишлоқдагиларни ўққа тута бошлади. Шундан сўнг маҳаллий аҳоли вакиллари жунглига қочган. Жангарилар эса қишлоқдаги уйларни тег-туги билан ёқиб юборган", дея ҳарбийларга кўмак бериш хизмати вакили Айсами Маммананинг сўзларини келтиради агентлик.

Шунга ўхшаш воқеа, 2 ҳафта олдин Гулани округида рўй берган, ўшанда ҳам отлиқлар отряди қишлоққа ҳужум уюштириб, 20 кишини ўлдирган эди.

Нигерия шимоли-шарқида «Боко Ҳарам» ташкилоти фаолият кўрсатмоқда. Бу гуруҳ вакиллари ғарбона ҳаётни инкор қилиб, бутун мамлакатга шариат қоидаларини жорий этмоқчи бўлади. Жангарилар мамлакат ичида тинимсиз терактлар ва ҳужумлар уюштириш билан чекланмасдан, Нигер, Камерун ва Чадга ҳам босқинлар амалга оширади.