Бразилия Posterscope ва NBS реклама агентликлари Зика вируси тарқалишига қарши курашда ёрдам беришга мўлжалланган Mosquito Killer кампаниясини ишга туширди. Бу ҳақда The Verge хабар берди.

Кампания доирасида Рио-де-Жанейро кўчаларида одамга хос нафас ва тер ҳидини таратиш учун карбонат ангидриди ва сут кислотаси эритмасини ажратиб чиқарувчи иккита реклама лавҳалари ўрнатилди. Тахминларга кўра, бу чивинларни жалб қилиши лозим. Ҳашоротлар билборддан чиқа олмайди ва нобуд бўлади.

Ғоя муаллифлари интернетда шунга ўхшаш билбордларни ишлаб чиқиш бўйича кўрсатмаларни юкладилар. Уларнинг сўзларига кўра, ушбу восита ҳашоротларни 2,5 километргача радиусдан жалб қила олади.

Жаҳон соғлиқни сақлаш ташкилоти чивинлар қопқони вирусга қарши курашда қўл келиши мумкинлигини тан олди, бироқ уларнинг самарадорлик даражасини белгилаш учун яна тадқиқотлар ўтказиш зарур.

Экспертлар қопқондан чиқиб кетган чивинлар янада кўпроқ одамларга зиён келтириши мумкинлигидан хавфсирамоқда. Бундай хатар қопқон одамлар кўп йиғиладиган жойларга ўрнатилган ҳолатда юз бериши мумкин.

2015 йилнинг апрелидан буён Бразилияда 1,5 миллиондан ортиқ киши вирусни юқтиргани қайд этилган, яна 2 миллиарддан ортиқ кишига вирусни юқтириш хавфи таҳдид солади.