Журналистларнинг тахмин қилишича, 21 апрель куни 90 ёшни қаршилайдиган Буюк Британия қироличаси Елизавета II ўз тахтини топшириши ҳақида маълум қилади.

Globe нашри маълумотига кўра, у тахтни ўзининг биринчи валиаҳди, ўғли Чарльзга эмас, набираси Уильямга қолдиради.

Нашрнинг ёзишича, Елизавета II расман 2016 йилнинг 31 август куни ҳукмдорликдан кетади.

"Қиролича ўз муаммоларидан толиққани кўриниб турибди. У ўғли ва келини билан боғлиқ можаролардан чарчаган. У ўз юбилейи арафасида бу можаро авж олиши туфайли, юбилейи куни тахтни ўғлига эмас, набирасига қолдириши ҳақида маълум қилиши кутилмоқда", дейилади хабарда.

Бундан олдинроқ, шаҳзода Чарльз ва унинг рафиқаси, малика Камилла Боулз можаролар марказида қолганди. Март ойида австралиялик Саймон Доранте-Дэй ўзини уларнинг никоҳсиз туғилган фарзанди эканини айтган ҳамда ДНК текшируви ўтказишни талаб қилган.

Бу хабарларга Бакингҳэм саройидагилар муносабат билдиришмаган.

2015 йилнинг 9 сентябрида қиролича Елизавета II бошқарув давомийлиги бўйича рекорд ўрнатганди. У ҳукумат тепасида 63 йил, етти ой ва икки кун турган ўзининг катта бувиси қиролича Виктория рекордини янгилаган.