АҚШ ва Саудия Арабистони Суриядаги ихтилофни сиёсий йўл билан ҳал қилишни маъқулламоқда, бироқ ҳали ҳам президент Башар Асад ўз лавозимини тарк этиши керак, деб ҳисобламоқда. Бу ҳақда Оқ уй матбуот хизмати Обама ва қирол Салмоннинг Ар-Риёддаги учрашув натижаларига кўра маълум қилди.

"Раҳбарлар Суриядаги адоватли ҳаракатларни тўхтатиш тартибини мустаҳкамлаш йўлини муҳокама қилдилар ва Асадсиз бошқарувга сиёсий ўтишни қўллаб-қувватлашларини тасдиқлашди", деб таъкидлаб ўтилди матбуот хизматида. Матбуот хизмати маълумотларига кўра, Обама ИШИДга қарши кампанияни фаоллаштириш зарурлигини таъкидлаб ўтди ва Саудия Арабистонининг "Ироқ ва Сурияда жангариларга қарши кураш олиб бораётган халқаро коалициядаги тутган ўрнини" ижобий баҳолади.

Обама ва қирол Салмон минтақавий ихтилофлар бўйича фикрлар алмашишди ва Обама Ямандаги ўт очишни тўхтатиш тартиби ва Саудия Арабистони томонидан мамлакат аҳолисига инсонпарварлик ёрдами кўрсатилишини қўллаб-қувватлади. Оқ уй раҳбари, шунингдек, Ироқ ҳукуматига, жумладан жангарилардан озод қилинган ҳудудлардаги вазиятни барқарорлаштиришда кўмак кўрсатиш кераклигига эътибор қаратди.

Бундан ташқари, етакчилар Исроил-Фаластин ихтилофи, Эроннинг "иғвогар ҳаракатлари" ва минтақадаги ижтимоий-сиёсий вазиятни муҳокама қилишди.