Эрон Ироқ билан алоқаларини ҳар томонлама яхшилашга ҳаракат қидмоқда ҳамда қўшни мамлакатни барқарорлик ва хавфсизлик билан таъминлашни ўз сиёсатининг муҳим йўналишларидан бирига айлантириш масаласини кўриб чиқмоқда. Эрон президенти Ҳасан Руҳоний Ироқ бош вазири Ҳайдар ал-Ободий билан бўлган телефон мулоқотида шундай таклиф билдирди. Бу ҳақида ТАСС нашри хабар берди.

"Эрон Ироқнинг барқарорлиги ва хавфсизлигини худди ўзиникидек қабул қилиб, қўшни мамлакатда террорчи гуруҳлар билан курашда ёрдам беришда давом этмоқда", - дея президентнинг сўзларини келтиради Эрон матбуот хизмати.

Руҳоний шунингдек "минтақадаги барча масъул идоралар ИШИДга ўхшаган террорчи гуруҳлар ва терроризм билан курашишлари шарт"лигини таъкидлади.

Руҳоний яқиндагина Ироқ шимолидаги террорчилар устидан қозонилган ғалабани эслатиб, "Ироқдаги барча сиёсий оқимлар ва қабилаларнинг терроризмга қарши бирлашуви ижобий натижаларга олиб келиши"ни айтди.

"Афсуски, баъзи мамлакатлар аёвсиз курашларга қарамай ҳануз ИШИДдан нефть сотиб олмоқда ва террорчиларни ҳарбий қуроллар билан таъминламоқда", - деб қўшимча қилди у.

Эрон раҳбари Ироқнинг ички муаммолари ҳал қилинишига ва Теҳроннинг Бағдод билан ҳар томонлама алоқа қилишига умид билдирди.

Бунга жавобан Ироқ бош вазири Ҳайдар ал-Ободий Эронга ИШИДга қарши курашдаги ёрдами учун миннатдорчилик изҳор қилди ҳамда террорчиларнинг минтақвий ва халқаро барқарорликка хавф солаётганини таъкидлади.