Спорт курашлари бўйича Ўзбекистон терма жамоалари 22-24 апрель куни Мўғулистон пойтахтида ўтказиладиган биринчи жаҳон лицензион мусобақасида иштирок этиш учун Улан-Батор шаҳрига жўнаб кетди.

Мазкур нуфузли мусобақада эркин ва юнон-рим курашида 1-3 ўринларни, аёллар курашида эса 1-2 ўринларни эгаллаган спортчилар XXXI ёзги Олимпиада ўйинларига йўлланмани қўлга киритади.

Жаҳон лицензион турнирини юнон-рим курашчилари бошлаб беради. 22 апрель куни ўтказиладиган баҳсда 59, 66, 75, 85, 130 кг вазн тоифаларида беллашувлар бўлиб ўтади. Мусобақанинг иккинчи куни аёллар ўртасида 48, 53, 58, 63, 69, 75 кг вазн тоифалари беллашувлар ўтказилса, 24 апрель куни эркин кураш бўйича 57, 65, 74, 86, 97, 125 кг. вазнларда баҳслар бўлиб ўтади.

Қуйида Мўғулистонга йўл олган терма жамоа таркиби берилган:

Юнон-рим кураши: - Елмурат Тасмурадов (-59 кг), Нурбек Холмуҳамматов (-66 кг), Суҳроб Фаттоев (-98 кг), Мўъмин Абдуллаев (-130 кг).

Аёллар кураши: - Зуҳра Мустанова (-53 кг), Набира Есенбаева (-58 кг).

Эркин кураш: - Нодиржон Сафаров (-57 кг), Рашид Қурбонов (74 кг), Умиджон Исманов (-86 кг), Магомед Ибрагимов (97 кг), Ҳасанбой Раҳимов (-125 кг).