Япония ҳукумати мамлакатнинг Mitsubishi Motors автомобиль концерни томонидан содир этилган қонунбузарлик учун жиддий чоралар кўради. Концерн раҳбарияти, бир неча кичик литражли моделлари ёқилғи сарфи билан боғлиқ маълумотларни қасддан ўзгартирганини тан олган эди. Бу ҳақда, кунчиқар юрт вазирлар маҳкамаси бош котиби Есихидэ Суга баёнот берди.

Унинг сўзларига кўра, истеъмолчилар ишончига путур етказувчи бу каби амалиётлар "жиддий ҳодиса"дир.

Бундан аввал, Япония ер, инфрақурилмалар, транспорт ва туризм вазирлиги ходимлари, компания бош қароргоҳи ва тадқиқот марказига текшириш мақсадида келишган эди. Айни вақтда, компанияни жавобгарликка тортиш, хусусан, жарима солиш масаласи кўриб чиқилмоқда.

Қонунда белгиланган меъёрларни бузиш ҳолларини компания президенти Тэцуро Аикава эътироф этган. Айрим русумдаги автомобиллар, қоидаларга номувофиқ равишда синовдан ўтказилган ва рақамлар ўзгартирилган.

2013 йил ўрталаридан ишлаб чиқарила бошлаган eK-Wagon, eK-Space ҳамда Nissan компаниясининг Dayz машиналари ёқилғи сарфи ўзгартирилган. Японияда 625 мингга яқин шу турдаги машиналар сотилган.

Ахборот манбалари ушбу хабарларни эълон қилгач, Mitsubishi Motor акциялари 15 фоиздан кўпроққа арзонлашган.