Сурия ҳудудидаги россиялик ҳарбийларнинг қирувчи самолётидан камида 2 марта Исроил Ҳарбий ҳаво кучлари самолётига ўт очган. Бу ҳақда Исроилнинг Yedioth Ahronoth нашри хабар тарқатган.

Бу маълумот манбаси келтирилмаган. Шунингдек, ҳодиса айнан қачон ва қайси ҳудудда рўй берганига аниқлик киритилмаган.

Хабарда айтилишича, Исроил президенти Реувен Ривлиннинг Москвада Россия раҳбари Владимир Путин билан 15 март куни ўтказилган учрашувида шу масала ҳам муҳокама этилган. Ўшанда Путин бу ҳодиса ҳақида илк марта эшитгани айтилган.

21 апрель куни Исроил бош вазири Биньямин Нетаняҳу Путин билан учрашув ўтказди, унда бу масалага қайтилгани ҳақида маълумот йўқ.

Исроил Мудофаа вазирлиги бу хабарга муносабат билдиришни истамаган.

Россия Мудофаа вазирлиги бу хабарни ўрганаётгани айтилган. Бу борада расмий маълумот берилмаган.