Чеченистон раҳбари Рамзон Қодиров ижтимоий тармоқлар орқали Чеченистонда юзлаб одамлар ичтерламадан заҳарлангани ҳақида хабарлар тарқатилганидан дарғазаб бўлди. Гапларга қараганда, республикада ичтерламадан 40 киши ҳалок бўлган ва юзлаб одамлар шифохонага тушган. Қодиров интернетда тарқалаётган бу хабарни "орсиз ва асоссиз ёлғон" деб атади.

"Ишонч билан айтаманки, бу орсиз, асоссиз ва очиқча ёлғон! Чеченистонда ҳеч қандай оммавий ёки якка заҳарланиш ҳолати қайд қилинмаган. Менинг топшириғим билан барча шифохоналар текширилди. Бу гапларнинг тарқатилишидан мақсад омма орасида ваҳима келтириб чиқаришдир. Мен томондан тегишли идораларга бу ҳолатни зудлик билан текшириш таклиф қилинди", деб айтди Қодиров.

Қодиров юзага келган вазиятни шахсан ўзи тафтиш қилиш ва ёлғон хабарлар тарқатилаётган манбаларни аниқлашга ваъда берди. Унинг айтишича, иғво ташкилотчилари ушланиб, жавобгарликка тортилади.

Ёлғон хабарларни Чеченистон соғлиқни сақлаш вазири Мусо Аҳмадов ҳам инкор этди. Аҳмадов "бу хабар ҳеч қандай асосга эга эмаслигини ва кимдирнинг иғвоси ёки ёвуз ҳазили эканлигини" айтди.

Охирги маълумотларга кўра, бир неча кун давомида WhatsApp мессенжери орқали Чеченистоннинг Гудермес туманида аҳолининг оммавий заҳарланиши юз бергани ҳақидаги хабарлар тарқатилмоқда.