Бангладешнинг маҳаллий университети профессори ишга кетаётган вақтда ўлдириб кетилган. 58-ёшли инглиз тили ўқитувчиси Ризоул Карим Сиддиққа уйига яқин бекатда автобусни кутаётган вақтда номаълум кимсалар ҳужум қилган ва ханжар билан сўйиб кетишган.

Қотилликнинг шафқатсизларча амалга оширилганини қайд этган полиция маҳкамасининг Франс пресс агентлигига маълум қилишича, профессорнинг бўйнига камида 3 марта пичоқ тортилган.

Сўнгги вақтларда Бангладешда машҳур блогерлар, дунёвий давлат тузуми тарафдорлари ва атеистлар ўлдириб кетилган эди.

Жиноятда Бангладеш жамоат арбобларига ҳужум қилаётган диний радикаллар гумон қилинмоқда. Биринчи навбатда, ўзларининг атеистик қарашларини ошкора тарғиб қилган блогерлар уларнинг нишонига айланишди. Улар асосан ханжар ва гўштболта ёрдамида ўлдириб кетилган.

Сиддиқ ҳам бир неча марта маданий тадбирларни ташкил этган ва Багмар шаҳрида авваллари диний мактаб ўрнида мусиқа мактабига асос солган эди. У шеър ва ҳикоялар ёзгани ва маҳаллий журнал муҳаррири бўлганига қарамай, диний мавзуларда ҳеч қандай баёнот бермаган.

Апрел ойи бошларида, Бангладеш пойтахти Дакка шаҳрида ҳам ҳуқуқшунос-талаба Назимуддин Самад ўлдириб кетилган эди. Бунгача, у ўзининг атеистлигини тан олган.