Эквадордаги Педерналес шаҳридаги кучли зилзиладан сўнг Дайко лақабли ит 7 кишини вайроналар остидан қутқариб қолишда иштирок этганди. 22 апрель куни ит ҳолсизликдан ҳалок бўлган. Бу ҳақида El Universo газетаси хабар берди.

Тўрт ёшли тилларанг ретривер тўрт кун фалокат минтақасида қулаган бинолар остидаги одамларнинг жойлашган ерларини аниқлашда хизмат кўрсатди. Итнинг шарофати билан 7 кишининг ҳаёти сақлаб қолинди. Бироқ Иббара шаҳридаги ёнғин-қутқарув хизмати бўлимидан қайтгандан сўнг ит ҳушини йўқотди ва ветеринар шифокорларнинг уринишига қарамай жон берди.

Ёнғин хизмати ходимларининг Facebook'даги саҳифаларида маълум қилишларича, ит иссиқ иқлимли Тинч океани қирғоқларидаги тинимсиз қутқарув операцияларидан кейин ҳолсизликдан туфайли нобуд бўлган.

Эслатиб ўтамиз, 16 апрель куни Эквадордаги Педерналес шаҳри ҳудудида 7,8 магнитудали зилзила содир бўлган. Сўнгги расмий маълумотларга кўра, талофат қурбонлари сони 602 нафарни ташкил қилган, тахминан 12,5 минг киши жароҳат олган. Мамлакатга етган моддий зиён бир неча миллиард долларни ташкил қилган.