АҚШдаги Fiat Chrysler концерни бутун дунё бўйлаб 1,1 млн дона автомобилини ортга чақириб олиши ҳақида маълум қилди.

Автомобилларнинг қайтарилишига сабаб, "парковка" вақтидаги носозлик ҳисобланади. Шу вақтгача автомобиль тураргоҳга жойлаштирилганидан сўнг ҳам ҳаракатда давом этгани бўйича 41 ҳолат қайд этилган.

Концерн 2012-2014 йилларда ишлаб чиқарилган Dodge Charger ва Chrysler 300 седанлари, 2014-2015 йилларда ишлаб чиқарилган Jeep Grand Cherokee русумли автомобилларини чақириб олади.

Рейтер агентлиги хабарига кўра, машиналар, асосан, АҚШ, Канада ва Мексикада сотилган. АҚШда 811 минг, Канадада 52 минг, Мексикада 17 минг автомобиль ортга қайтарилади. Қолган автомобиллар Шимолий Американинг бошқа мамлакатларида сотилган.

Шу билан бирга, концернинг Россиядаги Fiat Chrysler Automobiles бўлими ёқилғи насослардаги носозлик туфайли 6,6 мингта Jeep Grand Cherokee автомобилини ортга қайтаради.