Нью-Йоркда БМТнинг бош қароргоҳида иқлим бўйича Париж келишувини имзолаш маросими ўз ниҳоясига етди, деб хабар бермоқда "Интерфакс" ахборот агентлиги.

Ҳужжатни БМТга аъзо 175 та давлат, жумладан, Франция, АҚШ, Буюк Британия, Хитой ва Россия имзолади.

БМТ бош котиби Пан Ги Муннинг айтишича, келишувни имзолаган давлатларнинг рекорд сонда эканлиги халқаро ҳамжамиятга кучли мурожаат бўлиб, инсоният учун ҳаракат қилиш вақти келганини англатади.

Ушбу келишув 2015 йилнинг 12 декабрида Париждаги анжуман якунларига кўра қабул қилинган. Анжуманнинг барча 195 иштирокчиси сайёрамизда 2100 йилгача ўртача ҳаво ҳароратининг саноатгача бўлган даврга нисбатан 2 градусга ошишига йўл қўймасликка келишиб олгандилар.

Келишув 2020 йилдан кейин Киото протоколининг ўрнига келади.  

Эътиборлиси, келишув бутун дунёда Она ер куни сифатида нишонланадиган кунда имзоланди.