ИШИД террорчилари 22 апрель кунининг иккинчи ярмида Дамашқ яқинида қулаган ҳарбий самолёт учувчисини асир олгани ҳақида маълум қилди. Бу ҳақда Рейтер агентлиги ИШИДнинг ахборий манбасига асосланган ҳолда хабар тарқатган.

Қайд этилишича, учувчининг исми Аззам Еид бўлиб, у парашют орқали самолёт қулаган ҳудуд яқинида, Дамашқ шаҳридан шарқда жойлашган ҳудудда ерга қўнганида қўлга олинган.

22 апрель куни Syrian Observatory for Human Rights Дамашқ яқинида ҳарбий самолёт қулаб тушгани ҳақида маълумот берди. Бу самолёт қулаш олдидан ИШИД назорати остидаги ҳудуд устидан учиб ўтган.

Сурия қуролли кучларидаги манба бу самолёт Сурия Ҳарбий ҳаво кучларига тегишли бўлганини тасдиқлаган.