«Тоттенҳэм» жамоаси бош мураббийи Маурисио Почеттино Англия профессионал футболчилар ассоциацияси томонидан ташкил этиладиган тақдирлаш маросимига ўз футболчиларининг боришини тақиқлади.

Мураббий ўз шогирдлари АПЛнинг навбатдаги турида «Вест Бромвич»га қарши кечадиган муҳим ўйин олдидан чалғишларини истамаяпти. Маросимда турли номинациялар бўйича Ҳарри Кейн, Деле Алли, Дэнни Роуз ва Тоби Алдервейрелдга мукофотлар топширилиши мумкин.

«Вест Бромвич»га қарши ўйин 25 апрель куни, тақдирлаш маросимидан бир кун кейин бўлиб ўтади.

«Тоттенҳэм» айни вақтда 34 турдан кейин 68 очко билан биринчи ўриндаги «Лестер»ни 5 очколик фарқ билан таъқиб этмоқда.

Англия профессионал футболчилар ассоциацияси жамоанинг 4 футболчисини, Ҳарри Кейн, Деле Алли, Дэнни Роуз ва Тоби Алдервейрелдни мавсум рамзий терма жамоасига киритган.

Шунингдек, Деле Алли ва Ҳарри Кейн мавсумнинг энг яхши ёш футболчиси бўлиш учун даъвогарлар сафида қайд этилган.