Европанинг Sentinel-1a сунъий йўлдоши, Шимолий Кореянинг ядро синовларини ўтказувчи майдонини аниқлаш мақсадида радар текширувлари ўтказган. Олимларнинг фикрича, суратларда портлаш изларини кўриш мумкин. Германия тупроқшунослик ва табиий бойликлар федерал институти олимлари томонидан олиб борилган тадқиқот натижалари Европа Ер фанлари иттифоқи бош Ассамблеясида эълон қилинди, деб хабар қилмоқда BBC News.

Ерости синовлари Янгандо тоғли провинциясидаги Пхунгери ядро полигони яқинида амалга оширилган. Олинган суратларда, тоғ сатҳи бир ҳудудда 7 метрга пасайгани, бошқа жойида 2-3 сантиметрга кўтарилганини кўриш мумкин.

Sentinel-1a қурилмасида қўлланиладиган йўлдошли интерферометрияда ер сатҳи радар воситасида бир неча маротаба суратга олинади ва натижалар таққосланади. Ушбу суратлар, Пхеньяннинг ядро синовлари ўтказганини тасдиқлайди.

Аммо, Sentinel-1a имконияти чегараланган бўлиб, у айни ер сатҳини ҳар 12 кунда ўргана олади. Шу боисдан ҳам, олимлар тоғ сатҳидаги ўзгаришлар портлашдан кейин қачон пайдо бўлгани хусусида аниқ бир нарса дея олишмайди.

2016 йил 6 январь куни Шимолий Корея томонидан амалга оширилган портлаш хусусиятига кўра, 2013 йилгисига ўхшаб кетади. Балки, иккала ҳолатда ҳам шимолий кореялик ҳарбийлар таъкидлаганидек, водород бомбаси эмас, балки оддий бомба портлатилган бўлиши мумкин.

Ғарб олимлари ҳисоб-китобларига кўра, 6 январь кунги портлаш кучи 10 килотонна тротил қувватига тенг бўлган. Синов вақтида 5,1 баллик ер силкиниши ҳам қайд этилган. Пхеньян 2006 ва 2009 йилларда ҳам ядро синовлари ўтказгани ҳақида эълон қилган эди.