Саудия Арабистони ўзининг БАА билан чегарасидаги энг катта нефть кони "Шайба" ҳисобига нефть қазиб олиш ҳажмини янада кўпайтирмоқчи. Бу ҳақда Саудия Арабистони ҳукуматининг бу қароридан хабардор бўлган манбаларга иқтибос келтирган ҳолда Bloomberg ахборот агентлиги хабар бермоқда.

Дунёдаги энг йирик нефть компанияси Saudi Aramco нефть ҳажмини кондаги ишлаб чиқариш қувватларини модернизациялаш ёрдамида оширишни мўлжалламоқда. Бу билан боғлиқ ишларни май охиригача якунлаш режалаштирилмоқда. Бунинг эвазига кондаги нефть қазиб олиш ҳажми ҳозирдаги кунига 750 минг баррелдан 1 млн баррелгача ошади.

Нефть нархининг қулаши компаниянинг инвестицион дастурига таъсир кўрсатмади. Компания бош директори Амин Нассернинг айтишича, компания нефть қазиб олишга инвестиция киритишни давом эттиради.

ОПЕК 1-чорак якунларига кўра Саудия Арабистонида кунига олинадиган нефть ҳажмини 10,2 млн баррелга баҳолади, бироқ қироллик вакиллари бир неча бор нефть қазиб олиш ҳажмини бир ондаёқ 12,5 млн баррелгача кўтариш мумкинлигини таъкидлашган.