Буюк Британияда тиббиёт муассасалари ходимларининг иш ташлаши оқибатида 125 мингдан ортиқ жарроҳлик амалиётлари ва шифокор қабуллари бекор қилинди. Бу ҳақда The Telegraph хабар берди.

Маълум бўлишича, 26- 27 апрель кунлари Британия тиббиёт бирлашмаси (BMA) аъзолари бўлмиш ёш шифокорлар 48 соатлик иш ташлаш ўтказади. Шу икки кун давомида улар беморларга ҳеч қандай тиббий ёрдам кўрсатишмайди, шифохоналарда эса уларнинг ўрнини катта ёшли ҳамкасблари эгаллайди.

Мамлакат ҳудудидаги ҳар 3 шифохонадан биттаси танг аҳволда. Тахминан 38 фоиз тиббиёт муассасалари беморлар сони кўплиги туфайли тезкор чоралар кўришга мажбур бўлмоқда.

Буюк Британия соғлиқни сақлаш вазири Жереми Ҳант иш ташлаш иштирокчиларидан ўз қарорларини қайта кўриб чиқишни сўради, чунки норозилик акцияси бутун мамлакат бўйлаб беморларнинг ҳаётини хавф остига қўймоқда.