Россия президенти Владимир Путин ва Ўзбекистон президенти Ислом Каримовнинг дастлабки норасмий учрашуви 25 апрель, душанба куни кечқурун бўлиб ўтади. Бу ҳақда Россия президенти матбуот котиби Дмитрий Песков маълум қилган.

"Бугун Ўзбекистон президенти Ислом Каримов ташрифининг норасмий қисми ўтказилади. У Москвага бугун етиб келади ва икки давлат президентлари юзма-юз учрашиб, биргаликда тушлик қилишади", — деган Песков.

Матбуот котибининг билдиришича, 26 апрель куни ташрифнинг музокаралар ва ҳужжатлар имзолаш каби расмий қисмлари ўтказилади.

Икки давлат раҳбарлари халқаро ва ҳудудий масалалар бўйича фикр алмашиб, МДҲ, ШҲТ ва БМТ каби кўп томонли ташкилотлар доирасидаги минтақавий ҳамда халқаро масалаларнинг долзарб жиҳатларини, ўзаро ҳамкорлик масалалари бўйича фикрлар алмашишади.